Кондак 1
Избранного и вернаго во иереех Божиих восхваляем тя, богоносне отче наш Иоанне! Ты бо евангельстей истине последуя, Христу всем сердцем сораспялся еси, струю чудес и исцелений всем верным источаеши и ко спасению их направляеши. Мы же молитвами твоими в вере, надежде и любви укрепляеми, благодарне зовем ти: Радуйся, Иоанне, земли Российския молитвенниче предивный.
Икос 1
Ангела молитвы и проповедника покаяния ведаем тя, блаженне отче. Ходатайствуеши бо за нас у Престола Божия, да в разум истины приидем и жизнь свою на путь спасения направим, взывающе тебе:
Радуйся, благодати Божия сосуде избранный;
радуйся, премудрость Божию, яко млеко матере, сладостно впитавый.
Радуйся, Ангелу хранителю твоему, яко Товиа древле, вседушне последовавый;
радуйся, боголюбивых родителей целомудренный плоде чистоты непререкаемый.
Радуйся, в повиновении родителем своим благословение Божие стяжавый;
радуйся, от юности твоея водительству Духа Святаго прилежавый.
Радуйся, всем сердцем твоим Бога возлюбивый;
радуйся, в меру возраста Христова богомудренно возраставый.
Радуйся, Иоанне, земли Российския молитвенниче предивный.
Кондак 2
Предвидя, яко многия беды и соблазни грядут на Церковь Русскую и чада Божия в смятении будут, яко пастырь добрый, душу свою за паству готовый положити, глаголал еси людем: убойтеся соблазнов, стойте в вере православней, мужайтеся и крепитеся, и славьте Господа, взывающе Ему: Аллилуиа.
Икос 2
Разумом Божественным просвещаемь, богословия струи животочныя источил еси, всеблаженне отче Иоанне, в посте и молитве словеса Божия со слезами в сердцах верных сея, к свету истиннаго богопознания чад земли нашея призывал еси. Тии же, в любви Божии укрепляющеся, пояху тебе таковая:
Радуйся, евангельския истины пламенный ревнителю;
радуйся, глаголов жизни вечныя неумолкаемый возвестителю.
Радуйся, равноангельным житием твоим достойно украшенный;
радуйся, у Престола Божия о людех ходатаю верный.
Радуйся, от юности Церкви Христовей всем сердцем прилепивыйся;
радуйся, Христу сораспятися о людех вседушне возгоревыйся.
Радуйся, любовию Христовою сердце твое, аки ниву благоплодную, возделавый;
радуйся, людем, в скорбех и печалех изнемогшим, состраданием и молитвою облегчение подававый.
Радуйся, Иоанне, земли Российския молитвенниче предивный.
Кондак 3
Силою Божественныя благодати, яко углем горящим у жертвенника Божия возжжен, светильниче многосветле, во граде Кронштадте просиял еси, отцев наших похвало, отче Иоанне. Сице бо во тьме греховней обуреваемых и соблазном богоборчества колеблемых зарею Божественнаго разума просветил еси и научил еси пети: Аллилуиа.
Икос 3
Имея любовь велию к людем, Кровию Сына Божия искупленным, потекл еси к неимущим благочестия, трезвения и страха Божия и отчаянием обуреваемым, пастырю добре Иоанне, сих же кротостию и смиренномудрием покорив Христу, научил еси благодарне взывати тебе таковая:
Радуйся, сущих во тьме и сени смертней премудрый просветителю;
радуйся, о спасении людей, в пучине греховней обуреваемых, благостный попечителю.
Радуйся, неведущих Бога и окамененных сердцем к покаянию пробуждаяй;
радуйся, Божественною премудростию в писаниих твоих нас озаряяй.
Радуйся, сердец строптивых и злонравных благостное умягчение;
радуйся, ленивых и коснеющих совестию щедролюбивое обличение.
Радуйся, Слова Божия и правды Его проповедниче неустрашимый;
радуйся, житием благонравным козни духов злобы поднебесных победивый.
Радуйся, Иоанне, земли Российския молитвенниче предивный.
Кондак 4
Бурю злонравия, воздвизаему на Церковь нашу Святую, ведал еси, отче Иоанне, яко верный страж дому Господня, научал еси овцы Христовы бдети и право ходити в истинней вере и в заповедех Господних непорочно пребывати, да чистым сердцем и усты непрестанно взывают к Богу победную песнь: Аллилуиа.
Икос 4
Слышаще о тебе, яко ты еси сосуд избранный и благодатных даров преисполненный, подвигов милосердия и нищелюбия ревнитель, вдов и сирот, страждущих и обремененных утешитель и о нераскаянных грешницех молитвенник слезный, не токмо от Кронштадта, но и от всех конец земли потекоша к тебе людие Божии и исцеления от тебе получаху. С ними же и мы о гресех своих кающеся, яко ходатаю о нас пред Богом теплу, умильно зовем ти:
Радуйся, сеятелю правды, слезами твоими землю нашу освятивый;
радуйся, обличителю неправды, души верных от прелести греховныя свободивый.
Радуйся, свете сердец кротких и разумных, путь к Богу указуяй;
радуйся, ученьми твоими, яко кормилица кроткая, нас греяй и питаяй.
Радуйся, всех скорбящих и обремененных неложное упование;
радуйся, болящим и от духов злых страждущим благодатное врачевание.
Радуйся, сосуде избранный, дары Духа Святаго туне верным источивый;
радуйся, не о людех токмо, но и о скотех милосердовавый.
Радуйся, Иоанне, земли Российския молитвенниче предивный.
Кондак 5
Яко небосветлая звезда, священнолепным житием твоим просиял еси, пастырю Христов Иоанне! Богом дарованное тебе наследие от волков, губящих е, словом Божиим ограждал еси, пастырски взывая: возмите Крест Господень, на немже Христос, Царь Славы, рукописание грехов наших изглади, в Немже миру востание во веки. Мы же, сим знаменающеся, поем с тобою Богу победную песнь: Аллилуиа.
Икос 5
Видевше тя Российстии людие дивно на свещнице церковнем сияюща, правды Божия ищуще, к тебе притекаху и, яко другу Христову, исповедаху грехи своя. Мы же, обремененнии многими прегрешеньми, к тебе, блаженне Иоанне, прибегаем и тако глаголем:
Радуйся, яко силою благодати, яже в тебе, немощнии духом в любви Божии укрепляются;
радуйся, яко твоими молитвами кающиися плена греховнаго свобождаются.
Радуйся, яко труды твоими алчущии и жаждущии правды Христовы насыщаются;
радуйся, яко благовестием твоим врази Христови посрамляются.
Радуйся, яко молитвами твоими силы ада содрогаются;
радуйся, яко воздеянием рук твоих врата Небесная верным отверзаются.
Радуйся, в умилостивление за народ наш молитву, яко кадило благовонное, херувимски Богу приносивый;
радуйся, за неведущих правды и любве Божия молитися нас подвигнувый.
Радуйся, Иоанне, земли Российския молитвенниче предивный.
Кондак 6
Проповедницы чудных деяний твоих, блаженне Иоанне, явишася мнози: богатии и нищии, старцы и юноши; ты бо всем любовь свою изливал еси. Темже не токмо православнии, но и иновернии силою молитв твоих милость Божию обретаху, поюще Богу: Аллилуиа.
Икос 6
Возсиял еси житием твоим в Церкви Православней лучезарнее сияния севернаго, светом Евангелия Христова Отечество наше просвещая и от сетей вражиих чада церковная ограждая. Темже и ныне молим Господа Сил, да любовь святая утвердится в сердцах наших, во еже ни скорбь, ни теснота, ниже смерть самая не возмогут нас разлучити от любве Божия. И тако достигше сего, тебе воззовем:
Радуйся, яко Божиим смотрением грядущая на ны предвозвестивый;
радуйся, тесным путем в заповедех Божиих ходити нас научивый.
Радуйся, в скорбех и печалех сущим источник радости в Бозе указавый;
радуйся, оную радость, яко зеницу ока, свято хранити нам завещавый.
Радуйся, десницею и шуйцею оружие правды Божия содержавый;
радуйся, в словеси истины и любве нелицемерней сыну громову уподобивыйся.
Радуйся, порфирою покаяния всех облекаяй;
радуйся, диадимою благодати славно увенчанный.
Радуйся, Иоанне, земли Российския молитвенниче предивный.
Кондак 7
Хотя Всеблагий Господь спасти люди земли нашея и, яко злато в горниле огненнем, очистити я, вложи в уста твоя, всеблаженне, дух премудрости и разум провидца, во еже чрез покаяние сердечное и сокрушение слезное приуготовати я в вере непоколебимых к жертвенному служению, да со всеми святыми, в земли Российстей просиявшими, ангельски вопиют Богу: Аллилуиа.
Икос 7
Новаго избранника Божия, всеблаженне Иоанне, видяще тя, у алтаря Господня за всех молитвою слезною Христу сраспинающася, боголюбивии людие с верою к тебе притекаху и душевне и телесне исцеляхуся. Темже и мы, в немощи сущии, молим тя прилежно: воздвигни руце твои и не премолчи за ны ко Господу, якоже отец о чадех своих, да умножит Господь милость Свою на нас, приносящих ти сицевая:
Радуйся, у Престола Божия прилежный о нас печальниче и ходатаю;
радуйся, покаяния слезнаго усердный глашатаю.
Радуйся, образе неусыпнаго делания, яко Христу Богу работати прилежно нас наставляеши;
радуйся, яко на Божественней стражи веры апостольския стояти нас утверждаеши.
Радуйся, образ воздержания и целомудрия добре показавый;
радуйся, суеверия, ереси и злохуления от стада твоего отсекавый.
Радуйся, сущих во тьме неведения славный просветителю;
радуйся, душ человеческих от суеты житейския мудрый восхитителю.
Радуйся, Иоанне, земли Российския молитвенниче предивный.
Кондак 8
Странное чудо видим на тебе, предивный пастырю Христов Иоанне! Сама бо Пречистая Матерь Божия ублажи тя и последующих тебе и с радостию благоволение Божие всем возвести: о милейшая вы чада Отца Небеснаго! Сице бо радость Церкве Небесныя о подвизе земнем предвозвести. Сего ради и мы, надеждею на предстательство о нас Матере Господа Сил согреваеми, вопием Царю всех веков: Аллилуиа.
Икос 8
Весь желанием Божиим распаляемь, носитель любве Христовы явился еси, пастырю добре. В ней бо милость и истина сретостеся, правда и мир облобызастася; всякая же лесть упразднися, еретическое же злонравие, яко тля, попалися, скорби же человеческия елеем милосердия твоего утолишася. Мы же нерадивии сокровищ сих не стяжахом, праведным судом Божиим многим скорбем и печалем достойни явихомся. Но ведуще тя помощника неусыпна, умильно зовем ти:
Радуйся, любве Христовы неутомимый носителю;
радуйся, мира и правды ревностный сеятелю.
Радуйся, веры православныя незыблемый хранителю;
радуйся, благочестия и добронравия насадителю.
Радуйся, о всем мире печальниче и слезный молитвенниче;
радуйся, Церкве Христовы немеркнущий светильниче.
Радуйся, отцев наших похвало, нам же надеждо и утешение;
радуйся, богоизбранный пастырю, Святыя Руси благодатное украшение.
Радуйся, Иоанне, земли Российския молитвенниче предивный.
Кондак 9
Всем сущим в бедах и скорбех житейских воздвиже Господь на радость пастыря и чудотворца предивна Иоанна, да хромыя и разслабленныя, слепыя и от духов злых томимыя исцелит, в пагубнем пианстве и супружестей неверности растлеваемыя к непостыдней жизни призовет, во озлоблении же сущия к Богу приведет и сице в душах верных Царство правды Божия насадит, да воспоем вси спасительную песнь Богу: Аллилуиа.
Икос 9
Ветии многовещании недоумеют изъяснити силу молитвы твоея, Иоанне предивне, егда три юноши, дерзнувшия поглумитися о тебе и молитве твоей, спасительне наказал еси. Узрев же я кающияся и слезно молящияся, исцеление злохулителем от Бога испросил еси. Тии же, познавше молитвы твоея силу чудодейственную и любве твоея милосердие теплейшее, яко Божия провидца, ублажиша тя похвалами таковыми:
Радуйся, благое икономство чина своего богомудренно соблюдый;
радуйся, данный тебе залог, Тело Христово, цел и невредимь до последняго твоего издыхания сохранивый.
Радуйся, скрижали Богоначертанныя обою Завету достойне возвестивый;
радуйся, Церковь Христову благочестием пастыря добра прославивый.
Радуйся, истиннаго просвещения и христианскаго благочестия ревностный насадителю;
радуйся, кающихся грешников, сирых и убогих милостивый покровителю.
Радуйся, мудрый путеводителю, стези правды юным указуяй;
радуйся, судие нелицеприятный, зломудрствующия любовию наказуяй.
Радуйся, Иоанне, земли Российския молитвенниче предивный.
Кондак 10
Спасти хотя души ближних своих, ересьми и маловерием обуреваемыя, противу козней диавольских воздержанием и смирением вооружился еси, отче Иоанне, апостольское и святоотеческое веры исповедание твердо сохранив. Жертвенною же любовию Христу сраспинаяйся, душу твою за спасение народа Божия положив, Царствия Небеснаго достигл еси, идеже со Ангелы и лики святых непрестанно Бога славословя, поминай нас, славную память твою празднующих и поющих Богу: Аллилуиа.
Икос 10
Стена твердая бысть любовь твоя ко Господу, в нейже утвердися сердце твое, богоносне отче Иоанне. Сего ради всем притекающим к тебе с верою прибежище и утверждение явился еси, да всяческая Христу приобрящеши. Темже и нам, к тебе припадающим, буди стена крепкая и ограждение непреодолимое, да не посмеются хотящии нам злая, во еже в мире и любви Христове пребывати и приносити сия похвалы:
Радуйся, светильниче неугасимый, огнем Духа Святаго возжженный;
радуйся, крине, присно благоухаяй, росою благодати Божия напоенный.
Радуйся, росо сладкоплодная, благодатными дары верных оживотворяющая;
радуйся, соле земли, от греховнаго тления нас сохраняющая.
Радуйся, в море житейстем обуреваемым тихое пристанище;
радуйся, яко о помощи душевне и телесне изенемогающим Бога умоляеши.
Радуйся, сердцеведче предивне, верныя от лжемудрствования ограждаяй;
радуйся, силою молитвы чистыя союз супружеский в верности укрепляяй.
Радуйся, Иоанне, земли Российския молитвенниче предивный.
Кондак 11
Песнь достохвальную приносим ти, всеблаженне отче Иоанне, всем житием твоим прославившему Бога. И якоже видехом тя на земли долу у престола Господня за всех и за вся Владыку мира умолявшаго, сице и ныне на Небеси горе вознеси молитвы твоя, во еже непоколебимей быти Церкви нашей, да из рода в род во Отечестве нашем благочестно славится имя Триединаго Бога поющими Ему: Аллилуиа.
Икос 11
Светозарную свещу, во мраце жития сущую, зрим тя, Богом избранне отче Иоанне, ты бо на Небесех у Престола Божия в сонме святых и Сил Небесных о нас присно ходатайствуеши; воззри на нас, чад твоих, облегчи наша скорби и исцели наша недуги, да зовем ти:
Радуйся, яко в подвизе твоем имя Пресвятыя Троицы дивно прославися;
радуйся, яко благочестием веры твоея Церковь Христова украсися.
Радуйся, яко состраданием к ближним твоим скорби, и болезни, и печали всяческия утоляются;
радуйся, яко молитвами твоими кающиися грешницы Царствию Небесному приуготовляются.
Радуйся, спасительных благ земных и Небесных щедрый подателю;
радуйся, от враг видимых и невидимых надежный избавителю.
Радуйся, яко в земнем Едеме, Церкви Христовей, подвигом добрым просиял еси;
радуйся, яко доброты райския, уготованныя праведным, восприял еси.
Радуйся, Иоанне, земли Российския молитвенниче предивный.
Кондак 12
Благодатных даров Духа Святаго кладезь преисполненный яви тебе Господь, отче наш Иоанне, да тобою и мы сих причастницы будем и тако познаем милость Божию к нам, яко не отступит, ниже посрамит нас Господь, егда благодарными усты и чистым сердцем, уповающе на милость благоутробия Его, воспоем Ему: Аллилуиа.
Икос 12
Поюще твое достохвальное житие на земли и славу, юже стяжал еси на Небесех, молим тя, блаженне Иоанне, вознеси о нас молитвы Богу, да помиловани будем в день Судный и, спасаеми твоими молитвами, тако тебе воззовем:
Радуйся, богоизбранне и богопрославленне пастырю земли Российския;
радуйся, яко воспел еси имя Божие, аки орган мусикийский.
Радуйся, пророком и апостолом добре поревновавый;
радуйся, бегати гнева Божия и творити плоды покаяния мудре наставивый.
Радуйся, об Отечестве и народе нашем теплый молитвенниче;
радуйся, веры православныя истинный исповедниче.
Радуйся, пресветлая луче, путь к жизни вечней осияваяй;
радуйся, неисчерпаемую благость Божию нам открываяй.
Радуйся, трапезо неоскудеваемая, от неяже монаси и мирстии питаются;
радуйся, учителю правды Божия, еюже старцы и юноши украшаются.
Радуйся, яко ихже даде тебе Господь, сотворил еси я Богу в радование;
радуйся, яко от небожителей приял еси о Господе целование.
Радуйся, Иоанне, земли Российския молитвенниче предивный.
Кондак 13
О всеблаженне отче Иоанне, всероссийский пресветлый светильниче и предивный чудотворче! Приими хвалебное сие пение и умоли Христа Бога в мире и благочестии утвердити Святую Церковь, нас же всяких бед избавити и в единомыслии веры и союзе любве Христовы соблюсти, да едиными усты и единым сердцем воспоем с тобою Богу: Аллилуиа.
(Сей кондак глаголется трижды)
Икос 1
Ангела молитвы и проповедника покаяния ведаем тя, блаженне отче. Ходатайствуеши бо за нас у Престола Божия, да в разум истины приидем и жизнь свою на путь спасения направим, взывающе тебе:
Радуйся, благодати Божия сосуде избранный;
радуйся, премудрость Божию, яко млеко матере, сладостно впитавый.
Радуйся, Ангелу хранителю твоему, яко Товиа древле, вседушне последовавый;
радуйся, боголюбивых родителей целомудренный плоде чистоты непререкаемый.
Радуйся, в повиновении родителем своим благословение Божие стяжавый;
радуйся, от юности твоея водительству Духа Святаго прилежавый.
Радуйся, всем сердцем твоим Бога возлюбивый;
радуйся, в меру возраста Христова богомудренно возраставый.
Радуйся, Иоанне, земли Российския молитвенниче предивный.
Кондак 1
Избраннаго и вернаго во иереех Божиих восхваляем тя, богоносне отче наш Иоанне! Ты бо евангельстей истине последуя, Христу всем сердцем сораспялся еси, струю чудес и исцелений всем верным источаеши и ко спасению их направляеши. Мы же, молитвами твоими в вере, надежде и любви укрепляеми, благодарне зовем ти: Радуйся, Иоанне, земли Российския молитвенниче предивный.
Молитвы святому праведному Иоанну Кронштадтскому
Молитва первая
О великий угодниче Христов, святый праведный отче Иоанне Кронштадтский, пастырю дивный, скорый помощниче и милостивый предстателю!
Вознося славословие Триединому Богу, ты молитвенно взывал еси:
Имя Тебе — Любовь: не отвергни мене заблуждающагося.
Имя Тебе — Сила: укрепи мене изнемогающаго и падающаго.
Имя Тебе — Свет: просвети душу мою, омраченную житейскими страстьми.
Имя Тебе — Мир: умири мятущуюся душу мою.
Имя Тебе — Милость: не престай миловати мя.
Ныне благодарная твоему предстательству всероссийская паства молится тебе:
Христоименитый и праведный угодниче Божий!
Любовию твоею озари нас, грешных и немощных, сподоби нас принести достойныя плоды покаяния и неосужденно причащатися Святых Христовых Таин. Силою твоею веру в нас укрепи, в молитве поддержи, недуги и болезни исцели, от напастей, врагов видимых и невидимых избави.
Светом лика твоего служителей и предстоятелей алтаря Христова на святыя подвиги пастырскаго делания подвигни, младенцем воспитание даруй, юность настави, старость поддержи, святыни храмов и святыя обители озари!
Умири, чудотворче и провидче преизряднейший, народы страны нашея, благодатию и даром Святаго Духа избави от междоусобныя брани, расточенныя собери, прельщенныя обрати и совокупи Святей Соборней и Апостольстей Церкви.
Милостию твоею супружества в мире и единомыслии соблюди, монашествующим в делех благих преспеяние и благословение даруй, малодушныя утеши, страждущих от духов нечистых свободи, в нуждах и обстояниих сущих помилуй и всех нас на путь спасения настави.
Во Христе живый, отче наш Иоанне, приведи нас к Невечернему Свету жизни вечныя, да сподобимся с тобою вечнаго блаженства, хваляще и превозносяще Бога во веки веков. Аминь.
Молитва вторая
О великий чудотворче и предивный угодниче Божий, богоносне отче Иоанне! Призри на нас и внемли благосердно молению нашему, яко великих дарований сподоби тя Господь, да ходатай и присный молитвенник за нас будеши. Се бо страстьми греховными обуреваеми и злобою снедаеми, заповеди Божия пренебрегохом, покаяния сердечнаго и слез воздыхания не принесохом, сего ради многим скорбем и печалем достойни явихомся.
Ты же, отче праведне, велие дерзновение ко Господу и сострадание к ближним своим имея, умоли Всещедраго Владыку мира, да пробавит милость Свою на нас и потерпит неправдам нашим, не погубит нас грех ради наших, но время на покаяние милостивно нам дарует.
О святче Божий, помози нам веру Православную непорочно соблюсти и заповеди Божии благочестно сохранити, да не обладает нами всякое беззаконие, ниже посрамится правда Божия в неправдах наших, но да сподобимся достигнути кончины христианския, безболезненныя, непостыдныя, мирныя и Таин Божиих причастныя.
Еще молим тя, отче праведне, о еже Церкви нашей Святей до скончания века утвержденней быти, Отечеству же нашему мир и пребывание в правде Божией испроси и от всех зол сохрани, да тако народи наши, Богом храними, в единомыслии веры и во всяком благочестии и чистоте, в лепоте духовнаго братства, трезвении и согласии свидетельствуют: яко с нами Бог! В Немже живем и движемся, и есмы, и пребудем во веки. Аминь.
Тропарь, глас 1
Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Таин благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкве нашея украшение, моли Всеблагаго Бога умирити мир и спасти души наша.
Кондак, глас 3
Днесь пастырь Кронштадтский предстоит Престолу Божию и усердно молит о верных Христа Пастыреначальника, обетование давшаго: созижду Церковь Мою, и врата адова не одолеют ей.
Величание
Величаем тя, святый праведный отче наш Иоанне, и чтим святую память твою, ты бо молиши за нас Христа Бога нашего.
